Loader

港式奶茶 Tag

港式奶茶又名「絲襪奶茶」,除咗因為奶茶入口好似絲咁滑外,另一說法係食客將啡色嘅茶袋誤以為係絲襪。其實茶袋係用白洋布製成,白洋布質地薄而柔軟,布孔細密,可以將最幼細嘅茶都隔走;平時大家食嘅布拉腸粉,都係用白洋布整㗎! 咁絲襪又沖唔沖得奶茶呢?絲襪嘅密度唔夠高隔唔到茶渣,加上較薄同易爛,所以最好都係用返白洋布袋沖啦!...

啲人成日問我哋水吧師傅,沖茶有咩秘訣,其實好簡單,四個字「水滾茶靚」!我哋現代人想知水溫,可以用溫度計🌡,不過有經驗嘅師傅當然唔需要。咁古代人泡茶,點知水嘅溫度呢?就要靠目測喇!唔同溫度嘅水會有唔同嘅變化,喺古代文獻就有記載,古人稱唔同嘅階段分別為:蝦眼水、蟹眼水、魚眼水,接近沸騰時則稱為「湧泉連珠」及「騰波鼓浪」。大家下次煲水時不妨留意一下! 蝦眼水:約50℃ - 90℃*,壼底泛起嘅小氣泡 蟹眼水:約90℃ - 92℃*,水沸騰之前,氣泡漸大好似蟹眼一樣 魚眼水:約92℃ - 96℃*,馬上要進入沸騰狀態,水泡如魚眼 *溫度只供參考...

雖說每個人嘅口味都唔同,有人鍾意飲奶味稍為重啲嘅港式奶茶,又有人鍾意唔落糖,不過要判斷一杯港式奶茶正唔正,其實都有一個基準嘅! 同其他食物一樣,港式奶茶都係講求色、香、味:   👀:呈「金黃色」,睇吓會唔會唔夠色或者茶色「太瘀」,同埋有冇「掛杯」 👃:聞吓茶香會唔會夾雜草青味 👅:品嚐吓奶茶夠唔夠滑,有冇層次感 ⏰:睇吓夠唔夠火候,會唔會過咗火變「老」 聽落好似好抽象?快啲嚟上 #港式奶茶入門班 跟金茶王師傅學沖同歎一杯正宗嘅港式奶茶就清楚晒! ...

熱奶茶係茶餐廳嘅招牌飲品,可能大家都知落單時會寫「T」,原來仲有另一個叫法?冇錯就係「9T」!「9」嘅英文「nine」,同廣東話嘅「奶」讀音相近,而「T」就係「tea」,亦即係茶,咁兩個字加埋就係「nine tea」——奶茶喇!...

大家都知想炒個靚滑蛋,會加少少奶,但你又知唔知點解呢?我就聽過幾個說法,其中一個係指牛奶含有酪蛋白,等雞蛋可以喺低溫下逐漸凝固,唔會一下子變老,所以會滑啲;不過亦有人認為加咗奶會令蛋味變淡,唔應該喺炒蛋時加任何水或奶。唔知大家又鍾意食邊款蛋呢?...

「飛沙走奶」大家就聽得多,唔知「飛沙走石」又有冇聽過呢?「沙」其實係指白砂糖,因為兩者嘅外型好相似,所以「飛沙」即係走糖,而「石」即係冰粒,同樣因為冰粒同石頭嘅外型、質地都好似,所以「走石」就係走冰咁解!嚟緊去茶餐廳食飯可以試吓同伙計講:「嚟杯飛沙走石唔該!」...

有時候我哋茶餐廳請人,都會想請「文武吧」,唔通個伙計要「好打得」?梗係唔係啦!話說以前冰室一般都只係得水吧提供飲品同輕食為主,到後嚟轉型茶餐廳,有埋廚房可以供應炒粉麵同碟頭飯,如果個廚可以入得廚房埋鑊,又出得水吧沖咖啡茶同整「三寶」,就可稱為文武吧喇!...

又係我畢霆聰呀~之前同大家講過「反茶」,今次講吓「掛杯」啦!你以為講緊紅酒?咁就錯喇!其實大家日常飲到嘅奶茶,都會出現掛杯!只要沖奶茶嘅淡奶奶脂含量夠高,奶茶就會喺杯邊留下波浪形〰嘅痕跡,下次飲嘅時候不妨留意吓!...

吓?咪嘔住?做咩喺茶餐廳嘔呀?!係咪聽到一頭霧水呢? 當大家喺茶餐廳聽到「咪嘔住」嘅時候千祈唔好嚇襯,其實佢哋係叫緊鹹牛肉三文治呀!因為“牛”同“嘔”嘅讀音相近,而"住"同"治"嘅讀音都好似,加上伙計之間開玩笑, “咪嘔住”就慢慢代表咗鹹牛肉三文治喇!...